كلمة السر
مظاهرة
النهاردة من اول ما فتحت عينى ما شاء الله على كمية الاخبار اللى سمعتها
طبعا اول حاجة سألت عنها كالمعتاد الريس انتحى قالوا لى لاء
طب اللى فى التحرير مشيوا قالوا لى برده لاء
طب الله يكرمكم ايه اخر الاخبار
لاقيت سيل من الاخبار فوق نافوخى
الموظفون فى عمر افندى قاموا بمظاهرة
العاملين فى وزارة التربية والتعليم قاموا بمظاهرة
سائقى التاكسى الابيض قاموا بمظاهرة
موظفى المصرية للاتصالات قاموا بمظاهرة
ما شاء الله بقينا بلد المظاهرات
اخدت بعضى وقعدت على جنب وقلت ايه يا بت ايه الحكاية
كل البلد عماله شغاله مظاهرات على ودنه
كل اللى متضايق من حد يقوم يعمل مظاهرة
وفجأة الكل بقت اوضاعه مهببه وعاوز يحسنها
يبقى مين اللى كان مرتاح فى البلد
وبعد تفكير عميق اوى وصلت انى الوحيدة المرتاحة فى بلدنا
لانى الوحيدة اللى لسه معملتش مظاهرة
رغم انى والحمد لله عاطله عن العمل وقاعده فى بيتنا
يعنى اقصى طموحاتى اعمل مظاهرة من الصالة للمطبخ واكيد هتتفض قبل الحمام بشوية
وغالبا هيتم استعمال الشبشب والمقشة لفضها
واختكم اكيد مش هتقدر تصمد اكتر من 3 دقايق
وللعلم بفكر بجدية فى عمل مظاهرة اطالب فيها بحقوقى الدستورية اشمعنى انا
ليست هناك تعليقات:
إرسال تعليق