انت مننا ولا من الناس التانيين

فى الكام يوم اللى فاتوا بدات اسمع عبارة غريبة اوى فى الاول افتكرتها نكته
بس شوية بشوية لاقيتها بجد لما تتكلم مع اى واحد حتى ولو كان صاحبك تلاقيه يقولك فى بداية الكلام
"هو انت مننا ولا من الناس التانيين"

يا نهار ابيض بقى فى مننا وبقى فيه كمان ناس تانيين

ولما تقوله اكيد مع مصلحة البلد والامان والاستقرار يقولك "يبقى انت من الناس التانيين"

ايه يا جماعة ده بجد شئ غريب علينا اوى

هى مصلحة البلد قليلة ولا شئ مش كويس ولا لازم امسك شومة ولا سكينة وانزل ابلطج على الناس او امسك لى علم مصر وانزل اعملى مظاهرة

كل مصرى هدفه الاول والاخير مصلحة البلد دى ومهما اختلفنا فى الرأى مش معنى كدة ابدا اننا اكتر من فريق لا طبعا احنا فريق واحد بيحب بلده وان كان كل واحد ليه طريقته فى التفكير "ده طبعا خلاف اللى مش بيفكر اصلا "

يعنى مين بقى الناس التانيين يا سيدى طالما مصمم ان فى ناس تانيين اقولك هم مين ؟

الناس التانيين هم المستغلين لثورة حقيقية ضد الظلم والفساد وعاوزين يلحقوا لهم اى حاجة وخلاص بمعنى عاوزين حته من الكحكة من الاخر يلا يا بنى حمل وشيل اللى تقدر عليه

الناس التانيين هم اللى بيصطادوا فى الميه العكره وعاوزين يطلعوا على اكتاف اصحاب الثورة الحقيقين ودول اكيد مش بيحبوا البلد دى ولا يهمهم الا مصالحهم الخاصة

صدقونى كلنا هدفنا واحد ومش فريقين احنا فريق وناس بتحب بلدها بجد عاوزين نعيش فى بلدنا الجديدة بحرية وبكرامة وعاوزين نغير فى كل شئ للافضل واحلامنا ملهاش حدود ولا نهاية

مش هنزايد على بعض فى الوطنية وحب مصر ولا هنتاجر بالكلام والمصالح لاننا فعلا مصريين عارفين وحاسين كلنا ان المرحلة اللى جاية بتاعتنا احنا

وفى الاخر صدقونى البلد دى اتضح بأمانة انها مازالت مطمع فعلا وان العين عليها

بحبك يا مصر